2014 By-election om nawnlo ding ci-in kiteelna Commission in gen

2014 By-election om nawnlo ding ci-in kiteelna Commission in gen

Yangon-September 7
Kawlgambup kiteelna Commission Chairman U Tin Aye in 2014 September 7
ni, zingsang lamin Yangon Inn Nambat 10 -Shweli Lam, MPC Hall ah
Yangon khuasung bulphuh party omte tawh kimuhna nei in kiteelna Ngeina
Dan 11A tawh kizuiin 2014 kum sungin kiteelna -by election om nawn lo
ding hi ci-in gen hi. Tua mun ah kiteelna Commission makai U Win Kyi,
U Win Ko leh Secy-U Tin Tu, Yangon Region Commission Chairman leh
makaite, Yangon party zumhong party 35 makaite kihel hi.

Election Chairman U Tin Aye genna ah, 2014 March 20 niin anih veina
by-election kibawl ding hi ci-in Legu mipi palai U Phiu Min Thein
dotna tawh kisaiin ahun ding kha 3 ma-in hong kizasak ding hi, Asean
summit 2014 November 12-13 khit phetin kinei ding hileh December kal
nunung hidinga, vote zon hun ni 30 khit hiding hi. MP palai mun-awng
pen mipi palai 13, Minam palai mun 6 leh State/Region palai-mun 16
kigawm mun 35 bek ahi hi. MP mun pawlkhat buaina mun hi-a, vote phazah
leh vote piakna thute hangin kiteelna sum bei ding geelna billion 2
val hi-a, kiteelna ah angahte in 2015 January kha pan lutpan dinga,
2015 December sungin kiteelpina om leuleu leh kum khatsung kicianlo
semin nihvei kuanglui leh sum leh tha bei lawhlel ding hi. 2010 party
lutna Ngeina Dan 12 A-1 ah mun 3 aluilo party kiphiat ding hi cih om
hi.

Minam bulphuh party pawlkhat in koici bangin mun 3 ah lui thei
ding hiam cih thu ahi zongin 2008 Kawlgam Danbupi kikheelna om leh
zong, kitelna ngeina kikhel om ding a, PR kiteelna leh FPTP kiteelna
zong koi pen zang ding cih thute hangin 2014 by-election neihloh
dingin hoih kisa hi. Election Commission Dan 14 zuiin kiteelna vai
akisai zum, kipawlna, party makaite tawh kiho thei ding hi cih ngeina
hangin kipawlna leh party makai pawlkhat tawh kiho-in Election
commission ngeina Dan-11A zuiin 2014 By-election neih loh dingin hoih
kisa hi. Tua ahih manin 2014 kiteelna om nawn lo ding hi ci-in gen hi.
Pawlkhat in mawhsakna gen hi qMAL 6A14

Zomi Times