Christmas Wishes 2015
Zeisu sungah kongit thuzui U leh Nau, Nu leh Pate,
Dai dide, zan siangtho. Gumpa Zeisu hong suak. Khut neilo te’n
khutbeng un, khe neilote diangin lasa un ci-in a ottak ahi hi. Zeisu
in “mite in a zahtak mihoihte a samding in a hong pai ka hi kei a,
mite in a pampaih mite a samding in a hong pai ka hizaw hi,” ci-in na
gen hi (Matt 9:13).
“Aw Bethlehem vang khua neu bel phalbi daidam si-al tangnuai,………..
gan annkuang sungah gumpa hong suak zo hi.”
Lamdang hi: Nang hong it man hi (Jn. 3:16): Mikhempeuh ading nakpi
nuamna thu kong puak hi (cf. Lk. 2:10), ci napi’n i tel zo kei hi.
Mihing pianzia in a hizaw mun kidelh in, Pasian pianzia in a hilo zaw
mun hong teel man ahi hi. Thang van nun nuam nusia in, kiniamkhiatna
tawh mi bang hong piang, tual niam nuntakna hong zil, singlamteh tung
sih ding nangawn cibang teel, “… (Phil. 2:6-11)”, in leitungah hong
pai hi. Lamdang lua e, lungdam lua hang, eite hong it man ahi hi. Itna
lo tawh hibang nunniamnate hong tel zenzen lo ding hi. Hih a lamdang
Jesu suakna-in nang leh kei Pasian tawh hong kizom sak kik hi, Merry
Chrismas!
Leitung mite hong it man gupna hong pia (Col. 2:9,14): Gil kial
dangtak, haksat dong tuah, nat leh sat tam, lung zuan khua ngaih dahna
kahna’n meilum bang hong tuam na i simlei nunkhua pan hong tan khia
dingin gumpa Zeisu hong suak ta. I dah i kah ciang hong hehnem, i nat
i sat ciang damna hong pia, i thanem ciang tha hong guan, sihna lim
guam thuk sung pan hong honkhia hi (Heb. 2:15-18).
Hong piak letsong kilemna (Mt. 5:9; Lk. 2:14): Ih gen nop, Pasian
hong piak letsongin, kilemna (Shalom) ahi hi. Hih Shalom in Pasian
tung pan hong piangkhia a, i lungtang sungpan tui bangin hong luang
khia kilemna leh lungmuanna ahi hi. Christmas letsong kilemna-in –
Pasian tawh hong kilemsak bek hilo-in: Mun leh gam/mual tawh…Pasian
bawlsa nate khempeuh tawh hong kilemsak in, Pasian ta hihna khuavak
(Mt. 5:16), hong kilang khia sak hi. Leitung khempeuh tawh kilemna ahi
hi. Leitung lungdam nang Topa hongpai! Anuam lungdampawi.
Thukhupna: Chritmas hun sung pen leitungah accident atam pen hunin ki
ciamteh hi. A hang pen, hih hun sungin mite’n nena dawnna, gualnopnate
ah ki uangsan in akival zat man leh a pualam kizepnate kithupisak zaw
kha-a, Christmas i a deihna thumanpha pen i tel lo man ahi hi. Lungdam
bawl thu lai gil i nuntakpih a, hong itna thu i tel takpi leh, itna
lamdang tawh i galte nangawn it zo in, hong bawlsiate ading in zong
thupha ngetsak zo ding hi hang (Rm. 12:20; Prov. 25:22a). Ama hong
piak gupkhiat lungdamna-in kedeidanna le ahoihlo lungsimte hong bei
mangsak dinga, hong piak letsong, mihingte piak tawh a kibang hetlo
(Jn. 14:27) lungnopna hong pia letsong hia, tua in leitung nate
khempeuh tawh zong hong ki lemsak ding hi. Hih lungnopna leh khamuanna
pen mikhempeuh leh leitung mahmah tawh i san khop dinga, Pasian in
Christmas nia hong piak na dangte tawh tehtheihlo lungdambawl letsong
ahi hi.
Joseph leh Mary Pasian in azat man in eite in Christmas hun a zang
thei i suah mah bang in ei thu-um mite in zong Christmas a piangsak
sawnte i hih zawh nading in han ciam ni.
Pasian kimlai mihing aa hong piang i Topa Zeisu hong suah *Lungdambawl
Thupha daihna le daupaina thuphate note khempeuh tungah hong tungkim
ciat tahen!
Zogam Siampi
Siadaw Khen
Facebook tawh Comment piaknopleh .....