Jackie Chan zong galtai Refugee

Jackie Chan zong galtai Refugee

Tu-in kum 61 a pha Jackie Chan pen Hong Kong ah April 7,1954 in piang
hi. Sen tualgal hun sungin galtai refugee ahi uhhi. A neulai ki sapna
min dang pen Pao-pao ci uhhi. A khiatna pen abem bilbel a ki khukkhuk
cihna hi. Om mawh lua ki lumletlet ki khukkhuk ahih manin ei pau in
belbal teh icih dan aitam aw.

Amah pen laipilna lam-ah pil hetlo hih tuak hi. Nah-Hwa Primary School
sangah a kahleh laikia pah ahih manin sangkah nawnlo hi. A nu leh pa
Australia American Embassay te anhuan dingin a pai uh ciangin China
Drama Academy ah lutsak uhhi. Limlak drama lam ki va pah ahih manin na
madawk pah hi. Academy ah a kahpih Sammo Hung leh Yuen Biao te tawh
lawmta suak uh a, Three Brothers or Three Dragons cih min ki vawh uh
hi.

Kum 8 a phak ciangin “Little Fortunes” ah panga, kum 17 a phak ciangin
Bruce Lee film “Fist of Fury” leh “Enter The Dragon” te ah stuntman in
pang a, tua laiah ama min Chan Yuen Lung hi. Tuni tanih neih hi.
Galtai mi, laipillo mi ahih hangin a lunglutna lam-ah khauh takin nawt
suak vitvet hi. A ki cingin http://en.wikipedia.org/wiki/Jackie_Chan
ki sim thei hi.

Galtai mikhat ahih hangin a ukna khat ah hanciam in siam pen ding cih
hanciam den hi. Pahtawina tuamtuam zong tampi ngah hi. A lunglut khat
siam hi. Lunglut neih hi. Tupna neih hi. Hamciamna a nei, Tupna
lunglutna a neih mi khat hi. Pasian in leitungbup ah mihau mi
minthang khat in bawl hi. Hih theihloh a nei hetlo Topa hi.

Pasian in i sepna i lunglutna leh i tupna lamlam panin thupha hong pia
nuam hi. Khangno te sungah bang tupna na nei hiam cileng…theilo
aa…aci bang om kha ding hi. Tupna na nei keileh koikoi ah na om
zong, mihau gamhau te huan suangah i om zongin i tupna leh lunglutna
tungtawn bek panin hong zangh nuam Pasian tungah tupna ki cian hong
pia in cih thungetna ah hel tangtang ni. Ka tupna in Pasian deih
ahihiam? Pasian tawh a ki tuak diam cih sitzel ni. Pasian tawh ton
khop peuhleng ki neu sek luatna, mi tan pha kei nung ko khangah cihte
omlo hi. Hih ciang ka tunna pen Pasianin deihna khat neihin hong
tunsak hi theihi. Na suan na khak in Pasian hoihna, Pasian a minthang
sak dingin Pasian in hong siamnuam hi thei hi. Hong ngen un aci pa
tungah ni simin i lungdeih sinthu puak denni. Lungdam.

Thawn Tuang
May 19,2015
www.zomi-angvaan.blogspot.com