Kum (67) cin Zomi Nam Ni Hakha ah President Thein Sein in va uap

Kum (67) cin Zomi Nam Ni Hakha ah President Thein Sein in va uap

ZOMINAM NI kum(67)cinna Zogam khuapi, Khalkha ah 2015 February
19-21 sung Zogam bup huam-in thupi tak leh lungkim huai tak in kibawl
cih ki za hi.A kibawldan tuamtuam te in –

19.02.2015 (Nili ni)
Zingsang nai(11:30)Am hun-in Hakha, Vuantuumaung tukpeng tual ah
Department te nasepna, Township zui-in showroom kidemna leh kum
(67)cin ZOMINAM NI kongpi honna., Pu Win Tun (Forest Union Minister),
Pu Hung Ngai (Chief Minister), Pu Hau Khen Kham (Speaker, State
Parliament) leh Hakha khuanu khuapa tang-in Pi Sui Thluai Thang
te-in,Khau-at-na tawh honna nei uh-a, tua pan in show room, ngeina
van, ngeina tuamtuam kidemna te ki nei toto cih kiza hi. Nitaak hun-ah
Khuapi khen(9)pan tualsuak ngeina te lahna, duanghoih kidemna, Modern
ngeina laam kidemna te kinei to aa Naypyitaw pan hongzin Union
Minister te, CNF palai zinmang te zong kihel thei cih kiza hi.

20.2.2015 (Ninga ni)

Zingsang nai (9:00)Am in kum(67)cin ZOMINAM NI phawkna,
mutpuaklohna, meipaak lotna te tawh honna kinei aa, tua ban zom-in
Kawlgam dialkhai zahtaakpiakna Palik te makaihna tawh kinei hi. Zogam
khuapikhen (9)pan palai ten mun honglak khit ciangin amau teng tangin
PU SIANG MANG (Hakha) in KUM(67)CIN ZOMINAM NI tawh kisai leh ZOMINAM
NI hongpiankhiatna thu tomkimcing hong pulak hi.
Tua ban zom ah Zogam Chief Minister Pu Hung Ngai-in, Zogam sungah
kumkhat sung nasepna leh khantohna te kicingtak in genkhiat,
simkhiatna hong nei hi.

Tua ban zom-ah Myanmar President U Thein Sein ii kum(67)cin
ZOMINAM NI phawkna laikhak pen Union Forest Minister U Win Tun in
simkhiatna hong neihkhit aa, aban ah Union Parliament Pu Thura Shwe
Mann laikhak zong Chin State Parliament Speaker Pu Hau Khen Kham in,
mipi mai-ah hong simkhia hi.

Tua teng ban-ah Kum(67)cin ZOMINAM NI phawkna leh Zogam
khuaphialepmei vai KHUAPHIALEPMEI Union Minister U Khin Maung Soe in,
gencianna hongnei hi. tua a genna sungah Khalkha
<ma-ha-dat-aa-line>piakna-ah US$(2.68)Million leh Kawlsum
Ks.(5.5)Billion bei ci hi. Mahadataaline khuaphelep mei tawh 2015
sungin Falam, Mindat leh Matupi piakding kipanta-in, 2016-17 sung-in,
Tedim, Kanpetlet, Paletwa te piakding geelna te kinei ci hi.
President U Thein Sein leh alawm te vanleng(2)tawh nitaak lam
nai(1)in Hakha Zalatni Golf club hongtu-a, Khamtung piang Ngeina
tuamtuam te tawh dawnna kinei hi. Vuantumaung tukpeng tual ah (1:30)PM
in mipi Ngeina laam tawh kidawn zihziah in, Zongeina Inn a kilam innka
tau pan in thutom genna hongnei hi. Tua khit ciangin ZOZU kitulh-in,
inntual ah laamgui lam na kineipih to hi.

Kum(67)cin ZOMINAM NI phawkna “TON (Khuangcawi)” a la pen Panglong
ah minkui (Pu Kio Mang) tunu Mai Thluai Hlei Sung pen Hakha ngeina
tawh kizui-in, tong in, kilam hi.

President leh alawmte Zato ah akilam thak “Damlo te ki-at,
kikheina innthak”honna vanei suk uhhi. Zinte Pyitaungsu Geust
tawlngakna-ah tawlnga-in, nitaak lam ciangin Hakha khuasung Biakna
makai te tawh holim kamkupna nei thei uhhi. Tua thu kikupna-ah
Singlamteh phukna vai, Nipini siantho sak ding vai leh Biakinn lam
theihna te ki thupi kup pen cih kiza hi. Nitaak(Dinner)pen Hakha
khuanu khuapa te vaihawmna tawh CARSON HALL (Old bazzar ward)ah kinei
ngeingai hi.

President leh zin thupi te nitaak nai(7:30)pan nai(9:00)ciang
State Government zum huangsungah meiphualsep in lamgui lamna,
phiauphiina kinei-a, pahtawina leh maitaiina honkhat kingah cih kiza
hi.

Vuantuumawng tukpeng tual-ah Khanglui ngeina, Khangthak ngeina te
lahna, duanghoih kidemna te kizom to lai-a, nitaak nai(9)pan Lasiam
hongzin ahi., Thawn Kham, Si Tu Lwin, Kii Shing, Nicolas, Zamnu, Ro V,
Van Dawt Chin (moemoe)ten hongzai ziahziah aa nuam kisa-in, mipi
kisuakta mahmah cih kiza hi. Lamdang ka sak thu khat-ah mi pawlkhat in
‘Thangpaa’ hongpai lo hiam? cih hong kikankan aa, ki lunggulh mahmah
cih kimu khia hi.

Vuantuumawng tukpeng tual a kiu lam-ah kibawl “NGEINA
KIBUAN””PAIH”pen sun pan kipan kibuan toto-a, 21.2.2015 nitaak dong
kitona (challenge) om toto lai-a, a tawpna-ah Hakha, Khuathar veeng aa
teng Tluang Lian Thang in A KHATNA ngah-in, 2016 ZOMINAM NI ah USA ah
NGEINA KIBUAN dingin vapai ding ci hi. Tukum NGEINA KIBUAN “PAIH”ah mi
tam a zo penpen Vam Ram Or hi-a, mi(24)zo hi.

21.2.2015 (Nino Ni)

Zingsang nai(9:00)pan (12:00)sung President Thein Sein le alawmte,
Zogam sungaa om kumpinasep ulian khempeuh khantohna vai leh nasepsa te
etkikna, khantohna huhna tuamtuam te piakna.., State Government
Meeting Room ah nei uh-a, Zogam ading SKY NET, Computer leh
vantuamtuam hawmna nei cih kiza hi. Myanmar President leh alawm te
nitaak lam nai(1:00)in, Vanleng tawh NYIPYITAW vazuan kik cih kiza hi.
Khuapi zui-in Ngeina lahna, ngeina van lahna te kinei to lai-a,
nitaak lam ciangin a tamzaw phial in, van sengseng ta uh ci hi. Zan ah
Stage Show a nitaak nihna kizom to suak-a, khua dam zong phawklo in,
kidiang henhan ahih manin security te nangawn buai mahmah zo cih kiza
hi.

Omna kiukhat pan Khazih ading le Minam ading
note tawh anungta khawm dennuam;
Khual Suante
Zogam